“Bir üzüm gülür, bir üzüm ağlayır” EKSKLÜZİV

“Kimlər üçünsə qoy paxıl insan olum”

Musiqi yeganə dildir ki, yaşından, millətindən, dinindən, sosial mənsubiyyətindən asılı olmayaraq onu hər kəs başa düşür. Cəmi 7 kəlməsi olan bu dil sözlə ifadə olunmayacaq qədər mənalar kəsb edir. O, insanı həm sevindirə, həm kədərləndirə bilir. Məhz buna görə də əsl sənətkarlar sözünü ifası ilə deyir.

Şəlalənin bugünkü qonağı şou biznesin Maestro Ceyhun kimi tanıdığı İsmayılov Ceyhun Təhmasib oğludur...

- Maestro Ceyhun kimdir?

- Ceyhun Təhmasib oğlu İsmayılov. Sumqayıtda doğulmuşam, əslim Qubadlıdandır. Sumqayıt Musiqi Texnikumunu, bir də Konservatoriyanı bitirmişəm.  Ailəliyəm, iki övladım var.

- Niyə məhz skripka?

- Beş yaşım olanda məni valideynlərim nağara çalmağa qoyublar. Sonra müəllimlərim görüb ki, skripkaya həvəsim böyükdür və mənə bu sahədə ifa etməyi məsləhət görüblər. Artıq on beş ildir ki, orta məktəbi əlaçı bitirmişəm. Şükürlər olsun ki, bir zamanlar oxuduğum Sumqayıt Musiqi Texnikumunda müəllim işləyirəm.

- Skripkanın sirlərini ilk dəfə sizə kim öyrədib?

- İlk müəllimim Zemfira Kərimova olub. İndi də bir yerdə çalışırıq.

- Tələbələriniz çoxdurmu?

- Bir də görürsən ki, dostlarımdan kimsə zəng edib deyir: «Axşam bizə gəl, gör oğlumun necə skripkaya həvəsi var, bir bax gör ifası yaxşıdırsa, ona müəllim kimi dərs de». Gedirəm, görürəm ki, bu uşağın skripkanı heç görməyə gözü yoxdur. Yalnız fikri həyətdə samokat sürməyə, bir də internetdə oyun oynamağa var. Halbuki, valideynləri elə tərifləyir ki, fikirləşirəm, yəqin düz deyirlər. Gedirsən görürsən bunluq olan sənət deyil. Azərbaycan xalqı həmişə istedadlar yetişdirib, yetirəcək də. Hansı bölgədə mən istəyən istedadlı uşaq olarsa, canla-başla kömək etməyə hazıram. Tələbələrim var, amma dərindən maraqları yoxdur, tənbəldirlər. Hər insanın taleyi öz əlindədir. Mən indinin özündə də dünya musiqilərinin müxtəlif janrları ilə maraqlanıram.

- Bəs bəyənmədiyiniz ifaçılar varmı?

- Var, adını çəkməyəcəm, müğənnidir. Bəyənmədiyim musiqiyə nə qulaq asmağı, nə də onun haqqında danışmağı sevirəm. Mən ömrümü boş-boş mövzulara sərf etməyi xoşlamıram. Hazırda ürəyimdən o keçir ki, skripkada muğamı da ifa edim.

- Rəqibiniz varmı?

- Rəqibim yoxdur, toy məclislərində hamıdan da yüksək qonorar alıram.

- Bəzi kişi müğənniləri var ki, özlərinə bayağı şəkildə bəzək-düzək verir. Buna münasibətiniz necədir?

- Bu, bir bəladır. Fizioloji yox, bioloji, genetik bir müsibətdir. Heç kim mənə maraqlı deyil. Kim nə edir, özünə edir. Sənətimlə məşğul oluram.

- Hazırda sizə şou-biznesdə tələbat varmı?

- Əlbəttə, həmişə var. 1997-ci ildən sənətdəyəm. Bütün efirlər çağırır, nəsə bir yenilik olanda Kütləvi İnformasiya Vasitələrində yazılar dərc olunur. Xalqımın el şənliklərində iştirak edirəm. Vaxtı ilə Faiq Ağayevin, Aygün Kazımovanın orkestrinin bədii rəhbəri olmuşam. Sonralar solo ifaya başlamışam.

- Sirr deyilsə toylara neçəyə gedirsiniz.?

- Qiymət deməyəcəm. Çünki varlı təbəqə var, orta təbəqə var, kasıb təbəqə var. Kim istəyirsə, mən razılaşaram ki, həmin toyda iştirak edim. Çünki o, xeyir işində məni görmək istəyirsə, niyə də iştirak etməyim.

- Maestro Ceyhunun prodüseri yoxdur?

- İstəmirəm prodüserim olsun. Çünki bu sənətə gələn gündən özüm öz işlərimi görmüşəm. Bundan sonra da elə olacaq. Məclislərə gedəndə yanımda köməkçilərim olur.

- Toyda başınıza maraqlı bir hadisə gəlibmi?

- Maraqlı hadisələr çox olub. Yalnız birini deyə bilərəm ki, bir gün toya getmişəm. Həmin şadlıq sarayında üç mərtəbədə toy gedirdi. Mən birinci mərtəbədə ifa etməliydim, çıxıb ikinci mərtəbədə bir saatdır ifa edirəm. Ev yiyəsi yaxınlaşıb bildirir ki, Vallah, bizim elə də imkanımız yoxdur, sizi gördük, sevindik. Mən də dedim ki, halalınız olsun, bu qismətdir. Bir də gördüm ki, telefonuma zəng ediblər ki, sən harda qalmısan. Sonra getdik, ifa elədim. Səhər iki toy çıxdı yüksək qonorarla. Allah insanın ruzisini verir.

- Kişiyə xoşbəxt olmaq üçün nə lazımdır?

- Mənim rəhmətlik atam həmişə deyirdi: «Kişinin evi, maşını, ailəsi olmalıdır və yaxşı bir bağ evi olmalıdır. Evinə, uşağına bağlı olmalıdır. Qadın da evdə öz vəzifəsini yerinə yetirməlidir». Şükürlər olsun, mənim həyatda hər şeyim var, əsil kişiyəm. Həm də adımı qoruyub saxlayıram.

- Bəzi qadın və kişi həmkarlarınız sizi yekəxana adlandırır. Səbəb nədir?

- Məni kimlərsə yekəxana adlandırırsa, mən də onu yazıq insan adlandırıram. Məni efirdə görüb bəyənməyənlər küçədə gəzənlərdir. Öyrənməyiblər Ceyhun kimi kişi görməyə. Onlara sırğa taxan, onlar istədiyi kimi əylənən, «matışka» kimi kişilər lazımdır. Onlara mənim kimi əsil kişi lazım deyil. Ceyhunda yüksək mədəniyyət var, səviyyəsi böyükdür. Musiqinin bütün terminlərini bilirəm. Dünyagörüşüm böyükdür, hüquqları bilirəm. Senzura kimi tamaşaçıların, mənə dərs deyən müəllimlərin rəyini qəbul edirəm, belə bədbəxt insanların yox.

- Yaradıcılığınızda nə kimi yeniliklər var?

- Daima yenilik etməyi sevirəm. Durmadan çalışıram. Bilirsiniz ki, bəstələdiyim musiqilərin əksəriyyətinin sözləri gənc şair Cavidə məxsusdur. Hər müğənniyə də musiqilərimi vermirəm. Yeni diskim və klipim işıq üzü görəcək. Diskimin adı «Qubadlı» olacaq. Müğənni Səadət Cəfərovayla yeni mahnı üzərində işləyirəm. Musiqidən əlavə bizneslə də məşğul oluram. Yeni restoranım da var. Həyatda bəzi insanlar var ki, məni «Maestro Ceyhun» yox, Ceyhun İsmayılov kimi tanımaqlarını istəyirəm. Yeniliklərlə məni sevənləri sevindirəcəm.

- Təklikdə qalanda nə və ya kim haqda fikirləşirsiniz?

- Öz-özümə deyirəm: “niyə bu an tək qaldım?” Uşaqlıq illərini fikirləşirəm, gələcəyimi fikirləşirəm.

- Qısqanc insansınız?

- Əlbəttə, çox qısqancam.

- Elə bir kütlə var ki, Maestro Ceyhunu tanımasın?

- Bilirsiniz, həyat davam edir. Ola bilər ki, kimsə məni tanımasın. Heç kimi məcbur edə bilmərəm ki, məni tanısın.

- Şou-biznesdə bəzi həmkarlarınız tez bir zamanda ulduzluq xəstəliyinə tutulur. Buna səbəb nədir?

- Kimsə tez bir zamanda özünü ulduz hesab edirsə, elə ulduz xəstəliyinin dərmanını da özləri bilir. Qıraqdan baxanda çox gülünc görünür.

- Sizcə sevmək asandır, yoxsa sevilmək?

- Sevilmək çox çətindir.

- İnsanın mövqeyini nə sarsıda bilər?

- Yalnız xəyanət.

- Ürəkdən haçan ağlamısınız?

- Mən çox kövrək insanam. Hansısa musiqiylə yaşayıram, bir üzüm gülür, bir üzüm ağlayır.

- Qalmaqala münasibətiniz necədir?

- Sarı it də çaqqalın tayıdır.

- Ceyhun paxıl insandır?

- Kim deyir ki, paxıl insanam, çıxıb üzümə desin. Zirvədəyəm. Naşükür insan deyiləm, niyə paxıl olmalıyam? Onu da məni sevməyənlər deyir. Çünki mən hər müğənnini müşayiət etmirəm. Səviyyəmi qoruyub saxlayıram. Bir müğənni var ki, ondan xoşum gəlmir. Elələri boşboğazlıq edir. Qoy Allahımın yanında alnım açıq olsun. Kimlər üçünsə qoy paxıl insan olum.

Ola bilər ki, bu yazı bir çoxlarına soyuq və darıxdırıcı təsir bağışladı. “Şəlalə” rubrikasının kəskin, təzadlı və qalmaqallı müsahibələri ilə müqayisədə bu, belə görünə bilər. Amma bir şeyi unutmaq olmaz ki, virtuoz ifaçı danışmaqdan çox ifaya önəm verir. Çünki musiqi dünyanın bütün dillərindən zəngin bir dildir.

Şəlalə kənarında görüşənədək...

Şəlalə NƏRİMAN

O.M.   

Oxşar xəbərlər
Çox oxunan xəbərlər
Son xəbərlər

20.08.2014

19.08.2014

Müsahibələr
Arxiv
Avqust 2014
B.eÇ.aÇC.aCŞB
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31













free counters

free counters
Saytda yerləşdirilmiş materiallardan istifadə edərkən istinad mənbəyinin göstərilməsi zəruridir.
2010-2013 (c) Mediainfo.az | Rss | E-mail: info@mediainfo.az
Created by NetService.az